سودان تمورو
زمان كان في نكتة كده غريبة بتقول…انو في واحد سوداني..شال معاهو ويكة (بامية مجففة)للخارج… قامو قبضوهو في المطار وفحصوها…لانهم فاكرنها ممنو*عات… لقو انها مواد ليس فيها نفع…
يعني الويكة مواد ليس فيها نفع..حسب النكتة دي..وده شي خاطيء تماما…
نحن في عملية البناء المنظم لايجاد سبل لايصال المعلومات الصحية والقضاء على الجهل فيما يخص مواضيع الصحة..وتشجيع الممارسات الحياتية اللي بترفع من جانب الصحة للفرد والمجتمع…
جايين نقول ليكم انو الويكة(البامية) شي نافع تماما…مش نافع وبس..فيها فوائد كتيرة وبننصح بيها شديد…
علميا كده البامية دي نبات بسموهو قرون البذور… نبات صالح للاكل..بيتزرع في المناخات الدافئة والاستوائية..في افريقيا واسيا…
عندو تسمية عرفيا كده بقولو ليهو (اصبع السيدة) ،وبتجي بي لونين احمر واخضر…الاتنين عندهن نفس الطعم..
فاكهة..
البامية دي تصنيفها بيولوجيا نوع من انواع الفاكهه..وبتستخدم مثل الخضروات في الطهي… في دول كتيرة زي امريكا الجنوبية..
وبتحتوي على مواد غذائية كثيرة جدا…
يعني كباية واحدة من البامية النيئة بتحتوي على:
33 سعرات حرارية
7جرام كربوهيدرات
2جرام بروتين
0دهون
3جرام الياف
14%مغنيسيوم
15%حمض الفوليك
14% فيتامين أ
26%فيتامين سي
26% فيتامين ك
14% فيتامين ب 6
وتعتبر مصدر ممتاز لي فيتامين سي. اللي بيقوي المناعة وفيتامين ك اللي ليهو دور في تكوين الدم…
البامية منخفضة في السعرات الحرارية والكربوهيدرات وفيها بروتينات زي ما ذكرنا والياف…وبتتميز على كتير من الفواكه ب انها بتحتوي على بروتين وده شي بيخليها فريدة من نوعها
البروتين ليهو دور في وزن العضلات ونموها..
برضو البامية بتحتوي على مضادات اكسدة (بوليفينول) ،الفلافنويد والايزوكيرسيتين… اللي ليها دور في الوقاية من الامراض السرطانية..وبتقلل من امراض القلب ،وبتزيد من صحة الدماغ والحماية من الالتهابات… وكويسة شديد للوقاية من اعراض الشيخوخة وتحسين الادراك والتعلم..وزيادة مستوى الذاكرة..
البامية ليها فوايد كتيرة لامراض القلب..وبتقلل من الكوليستيرول…
بتحتوي على بروتين (الليكتين) وده ليهو دور وقائي من الامراض السرطانية… وده كان عن طريق دراسة تمت على سرطان الثدي ..لقو البامية بتقلل من نمو الخلايا السرطانية بنسبة تصل ل 63%…
بس لسه البحوث مازالت مستمرة بحيث انها تدعم الكلام ده بي شكل اكبر فيما يخص قضاء البامية على الخلايا السرطانية..
البامية ليها دور في تخفيض نسبة السكر في الدم..والحاجه دي مهمة جدا للصحة لعامة والوقاية من مضاعفات السكري..او الاصابة ب السكري…..
بس برضو في تنبيه بسيط انو البامية عندها تداخل مع دواء منظم السكري (الميتفورمين) ف حاولو بقدر الامكان لو بتاخدوهو تفصلو بينو وبينها لانو غير موصى بها للناس اللي بياخدو (منظم السكري ميتفورمين)
البامية كويسة شديد للنساء الحوامل…لانو فيها فيتامين ب9 اللي هو حمض الفوليك اسيد… وليهو دور في تقليل تشوهات الاجنة…من انعدام دماغ او غيرو..
اشتري البامية ي محاسن..وخزنيها في التلاجة او مكان بارد لكذا يوم قبل ما تطهيها…
يبقى النكتة الفوق..عبارة عن شي خاطيء… وانو عادة اكل السودانيين للبامية (الويكة) هي عادة صحية..لا بد من نعزز من الممارسة دي وننصح بيها لانها ذات فوائد كتيرة…
وقعت؟!