سودان تمورو
مضت ايام قليلة على وجودهم معنا أصوات رصاصهم لا تفارقنا أصبحت من متلازماتنا.. الشريف عبدالرحمن عليه الرحمة جالسا في صفاء على كرسيه الأثير فيما بقى من ظل النيمة متمتما باذكاره غانم و الوسيلة في المطبخ بعد أن كسبا مهارة الطبخ بعد أن أصبحنا عزابة ويأتي دوري في المطبخ لاحقا فقد بقينا اربعتنا فقط في البيوت وننتظر صديق الشريف الدائب الحركة.. جاء مستاء يجرجر قدميه يضرب بعصاه الأرض في رتابة مزعجه متسائلا (ناس التلفزيون ديل ماشايفين الحاصل دا) وسأله الوسيلة (ياتو تلفزيون) ويجيب (تلفزيون الحدث.. كنت بسمع في واحد اسمه طقيق قال مستشار وواحد تاني اسمه الزين صحفي قالوا ناس الجزيرة مرتاحين وعايشين في أمن وأمان مع الدعامه) ويجيب الوسيله (تاني ماتشوفها دي قناة اسمها الحقيقي الخبث ومعاها واحده تانية اسمها العبرية.. وطبيق دا تابع لحميدتي والزين دا صحفي مشهور بالزين الكضاب).. ويسال الوسيله (لكن مستشار يعني شنو؟) ويجيب الوسيله (يعني انت جزار وانا عايز اشتري بهيمه بجيبك انت تقيم لي سعرها انت هنا مستشاري) ويقاطع الوسيله ساخرا (يعني نحن بهايم والشاري حميدتي والمستشار طقيق)
وتتعالي ضحكاتنا رغم الوجع.